Beidh láithreoirí aimsire TG4 ag babhtáil le láithreoirí aimsire RTÉ arís i mbliana chun Seachtain na Gaeilge i gcomhar le Energia a chomóradh.
Beidh Darren Ó Dubhgáin, Fiona Ní Fhlaithearta agus Donncha Ó Murchú TG4 ag babhtáil le Nuala Carey, Karina Buckley agus le Helen Curran. Ní bheidh siad ag taisteal de bharr shrianta Covid-19 áfach, ach déanfar na míreanna a thaifeadadh i TG4 agus in RTÉ nó in aice le tithe na láithreoirí féin. Is é Darren Ó Dubhgáin a bheidh ag cur príomhfheasachán aimsire TG4 i láthair ó Cheannáras TG4 i mBaile na hAbhann ag 18:57, díreach roimh Nuacht TG4, agus as sin rachfar chuig Nuala Carey RTÉ i nDún Laoghaire agus chuig Karina Buckley a bheidh taobh amuigh d'Áras an Uachtaráin.
Is í Helen Curran a chuirfidh feasachán aimsire RTÉ One News and Weather i láthair agus rachfar chuig Fiona Ní Fhlaithearta TG4 ansin a bheidh ag Túr Chamuis i gConamara, áit a bhfuil radharc álainn amach is amach as. Nuair a bheidh Fiona réidh rachfar chuig Donncha Ó Murchú i mBóthar na Trá.
Is éard a dúirt Fiona Ní Fhlaithearta "Is deis iontach a bheidh anseo le ceiliúradh a dhéanamh ar Sheachtain na Gaeilge ar bhealach éagsúil agus an dlúthchairdeas atá idir TG4 agus RTÉ le fada an lá a léiriú."
Is éard a dúirt Karina Buckley "Táim ag súil le húsáid a bhaint as mo chúpla focal i mbliana mar chuid de Bhabhtáil na Láithreoirí Aimsire do Sheachtain na Gaeilge. Ní bheidh sé de dheis agam faraor cuairt a thabhairt ar lárionad chraoltóireacht na Gaeilge i mBaile na hAbhann i mbliana de bharr shrianta Leibhéal 5 ach beidh an deis agam an aimsir a chur i láthair ó thaobh amuigh de theach fhear mór na Gaeilge, an tUachtarán Micheál D. Ó hUigínn. B'fhéidir go bhfeicfimis Bród & Misneach freisin, má bhíonn an t-ádh orainn!"
