Labhair an fuirseoir as an Daingean, Julie Nic Eoin, nó Julie Jay mar is fearr aithne uirthi le Helen Ní Shé ar An Saol Ó Dheas ar RTÉ Raidió na Gaeltachta mar gheall ar a ceird.
Múinteoir scoile a bhí in Julie go dtí gur thapaigh sí an deis tabhairt faoi phost mar fhuirseoir agus ag éirí go hiontach léi ó shin; bhí sí ag an Edinburgh Fringe Festival lena seó, Julie Really Love Me le déanaí agus ba í a d'oscail an Tommy Tiernan Show ar RTÉ le bliain anuas.
Deir Julie gur úsáid sí an greann ariamh mar bhealach le dul i ngleic le dúshláin an tsaoil agus mar sin go ndearna sé ciall di dul leis an gceird sin mar shlí bheatha agus í ina duine fásta. Anois agus í i mbun na hoibre deir sí go bhfuil sé dúshlánach ach taitneamhach mar sin féin. Déanann sí trácht ar na meáin shóisialta, áit a ndéanann sí iarracht a cuid oibre a phoibliú ach áit a bhfuil daoine sásta rudaí gránna, pearsanta a rá. Deir Julie go bhfuil nós ag daoine mná a mhaslú mar gheall ar an gcuma fisiciúil go minic agus go bhfuil sé deacair glacadh lena leithéid.
'do bhíos i gcónaí píosa beag dorcha'
Maidir leis an saol atá ann do mhná san fhuirseoireacht, deir sí go bhfuil cúrsaí ag dul i bhfeabhas ach go bhfuil 'brú breise' fós ann do mhná. Admhaíonn Julie gur duine 'bog' í agus go ngortaíonn na maslaí seo í ach deir sí gur 'cuid den jab, gan cur in iúl go bhfuil tú trína chéile'. Bíonn formhór na ndaoine a bhíonn i dteagmháil le Julie fíordhearfach ach go bhfuil corrdhuine a chaitheann go dona léi.
Ag caint maidir leis an mbrú a bhaineann le bheith ag plé leis na meáin, deir sí go bhfuil neart dá cairde ag íoc botox a fháil agus go raibh sí féin ar tí é a fháil ach gur bhraith sí faoi an iomarca brú ag an dochtúir. Labhraíonn Julie faoina leithéid mar gur maith léi a bheith macánta faoin mbrú seo.
Craoltar An Saol Ó Dheas idir 12.08 agus 1.00 ar RTÉ Raidió na Gaeltachta ón Luan go hAoine.
