Ba é Keelan McGrath ó Bhoiríos Uí Chéin i dTiobraid Árann a thug leis Bonn Óir Seán Ó Riada oíche Dé hAoine in Óstán an Rochestown Park i gCorcaigh. Tá Keelan 16, agus tá sé ar an té is óige riamh a bhuaigh an bonn.
Tá Keelan san idirbhliain i gColáiste Pobail Bhoiríos Uí Chéin. Tá ceathrar uilig sa teaghlach agus tá sé ar an duine is sine acu agus casann siad uilig ceol. Casann a athair Brendan an bainseó freisin, ach ról tacaíochta atá ag a mháthair Regina a bhí ina theannta oíche Dé hAoine ag an gcomórtas.
Tá Keelan ag casadh ceoil ó bhí sé ocht mbliana d’aois, agus d’fhoghlaim sé a cheird ó Ned Kelly, fear a bhfuil sé an-bhuíoch dó go fóill as an méid a rinne sé dó.
Seo an dara huair go raibh na huirlisí seo, consairtín agus bosca, i gceist sa chomórtas don Bhonn Óir agus cháiligh Keelan don chraobh an chéad uair freisin, gan é ach 12 bliain d’aois an uair sin.
Ní haon iontas é gur thug sé abhaile an duais Dé hAoine, mar tá go leor duaiseanna eile buaite aige le blianta anuas. Orthu sin tá Craobh na hÉireann faoi 15 dhá bhliain i ndiaidh a chéile, agus an Chraobh faoi 18 anuraidh ag Fleadh Cheoil na hÉireann in Inis, an chéad bhliain dó a bheith san iomaíocht sa rannóg sin.
Bhain sé siar as Keelan nuair a chuala sé go raibh an duais buaite aige Dé hAoine, ach dúirt sé go raibh áthas an domhain air mar sin féin. Dúirt a mháthair Regina go raibh sí thar a bheith bródúil as.
Ní fada anios go mbeidh Keelan ag bualadh bóthair le taisteal go Luton, Shasana, áit a mbeidh sé ag casadh ag féile do Lá le Pádraig leis an ngrúpa Rigs and Jeels ó Thiobraid Árann.
