Tá folúntas ag RTÉ Raidió na Gaeltachta faoi láthair don phost mar Eagarthóir Stiúrtha Nuachta (ESN) agus cuirfear fáilte roimh iarratais ar an bpost.
Post sinsearach bainistíochta agus eagarthóireachta atá i gceist, lonnaithe i gCasla i gCo. na Gaillimhe agus ag tuairisciú do Cheannaire na seirbhíse. Oibríonn ESN na seirbhíse mar chuid den fhoireann bhainistíochta chun an stáisiún a stiúradh agus a fhorbairt chun an líon is mó lucht éisteachta agus is féidir a mhealladh agus, ag an am céanna, ár gcúram seirbhíse poiblí a chomhlíonadh. Mar cheannaire foirne cuideoidh an duine seo le seirbhís raidió trí Ghaeilge den chéad scoth a chur ar fáil taobh istigh de na hacmhainní daonna agus airgeadais atá ar fáil.
Beidh an té a cheapfar freagrach as Rannóg na Nuachta a bhainistiú, measúnú agus maoirseacht a dhéanamh ar an bpróiseas léirithe agus eagarthóireachta sa rannóg, acmhainní agus buiséid a bhainistiú agus a riaradh. Beidh ar an té seo caighdeáin ábhar craolta, obair iriseoireachta agus cur i láthair a mheas agus a fhorbairt. Tá an Rannóg Spóirt mar chuid de Rannóg na Nuachta agus beidh an tEagraí Spóirt ag tuairisciú don ESN. Beidh teagmháil rialta ag an ESN le rannóga eile in RTÉ.
Tá iarrthóirí á lorg:
- le fís, tuiscint, taithí eagarthóireachta agus cumas cinntí stuama eagarthóireachta a dhéanamh, go háirithe i réimse na nuachta agus cúrsaí reatha.
- atá in ann feidhmiú go cumasach agus go hábalta faoi bhrú, fuinneamh agus cruthaitheacht a léiriú, agus a bheith tiomanta do sheirbhís nuachta atá cuimsitheach, cothrom agus neamhchlaonta a sholáthar.
- le sár-scileanna cumarsáide, atá in ann foireann chruthaitheach iriseoireachta agus léiriúcháin a spreagadh agus a threorú.
- le tuiscint ar chraolachán seirbhíse poiblí, treoirlínte RTÉ agus eolas beacht ar éiteas agus lucht éisteachta RTÉ Raidió na Gaeltachta, le tuiscint ar riachtanais an phobail sin, agus iad a chur i gcroílár gach a dhéanaimid.
- le taithí ar cheannaireacht i ról eagarthóireachta nó léiriúcháin, agus comhordú ar chraoltaí seachtracha.
- atá in ann caidreamh sármhaith a chruthú le páirtithe leasmhara inmheánacha agus seachtracha chun tograí agus smaointe a bhrú chun cinn.
- le sár-scileanna eagrúcháin agus pleanála.
- le ardchaighdeán i labhairt agus i scríobh na Gaeilge.
Is buntáiste a bheadh ann do dhuine dá mbheadh scil agus spéis acu in úsáid a bhaint as na meáin shóisialta chun ábhar a sheachadadh agus cur leis an méid daoine gur suim leo an tseirbhís.
Bainisteoir Rannóige Grád 2 é leibhéal an cheapacháin seo agus beidh an post á thairiscint mar cheapachán lánaimseartha ar bhonn leanúnach.
Iarrtar ar iarrthóirí litir iarratais, Curriculum Vitae agus cáipéis (1,000 focal) a chur chugainn. Beidh plé le déanamh ar na pointí seo a leanas sa cháipéis 1,000 focal.
- Céard é ról na Rannóige Nuachta atá ag RTÉ Raidió na Gaeltachta?
- Déan cur síos ar an bhfís atá agat do thodhchaí na rannóige nuachta.
- Cén chaoi a gcuirfear do phlean i gcrích agus tabhair léargas ar na dúshláin agus na deiseanna a bheidh ann.
Ní mór an trí cháipéis a bheith i nGaeilge, agus iad a bheith mar chomhad amháin mar chuid den iarratas ar líne.Is é an spriocdháta i gcomhair iarratais ná Déardaoin, an 11ú Bealtaine 2023, ag a 5 i.n.
Tá RTÉ tiomanta don éagsúlacht ina lucht saothair agus fáiltíonn roimh iarratais ó dhaoine a bhfuil cúlraí éagsúla acu. Fostóir comhionannais deise é RTÉ agus déantar iarratais cáilithe a mheas gan beann ar inscne, gnéas chlaonadh, aois, taithí shóisialta, cine agus eitneacht, éagumas, stádas sibhialta an teaghlaigh, creideamh ná ballraíocht den Lucht Siúil.