Tá Uachtarán na hÚcráine, Volodymyr Zelensky, tar éis a phríomhoifigeach agus a phríomh-idirbheartaí, Andriy Yermak, a bhriseadh as a phost.
Rinneadh seo taréis do bhleachtairí a árasán a chuardach mar chuid d'fhiosrúchán cuimsitheach éillithe.
Buille trom do Zelenskyy é an cor is deireanaí seo sa pholaitíocht inmheánach na tíre. Bhí Yermak ceaptha bheith lárnach i gcainteanna faoi phlean síochána na Stát Aontaithe an tseachtain seo chugainn. Rachaidh na cainteanna ar aghaidh, ach tá idirbheartaí nua le ceapadh ag an uachtarán.
Tá roinnt conpspóidí inmheánacha, ionsaithe laethúla seasta na Rúise agus an imní mhór faoi phlean síochána Donald Trump ag cur brú millteanach ar Zelensky.
De réir an phlean seo ag Meiriceá, atá cáinte ag tíortha de chuid an Aontais Eorpaigh, ní bheadh ar an Rúis aon chuid den talamh atá gafa aic ó thús an ionsaí i 2022 a ghéilleadh, bheadh srian ar fhórsaí cosanta na hÚcráine agus cosc ar an tír bheith ina bhall de NATO.
I ráiteas ón uachtarán inné dúirt sé go raibh atheagar le cur ar Oifig an Uachtaráin agus go mbeadh Anriy Yermak ag éirí as oifig.
Tháinig an fógra go gairid tar éis d'imscrúdaitheoioirí náisiúnta frith-éillithe ruathar a dhéanamh ar árasán Yermak. Cé nár dúradh go baileach céard a bhí á fhiosrú, dúradh go raibh Yermak ag comhoibriú go hiomlán.
Cheana féin, bhí sé curtha i leith Yermak go raibh baint aige le scéim breabaireachta $100m san earnáil fuinnimh, earnáil atá faoi bhrú mór ó shíorionsaí Rúiseacha ar ionaid breosla agus ar an ngréasán leictreachais.
D'fhéach Zelensky leis an bhfearg forleathan i leith Yermak a cheansú agus an pobal a aontú agus a thabhairt le chéile.
Tá an cor is deireanaí seo ag teacht ag am cinniúnach sa chogadh a thosaigh mí Feabhra 2022.
Seachtar atá gortaithe thar oíche san ionsaí Rúiseach is deireanaí ar an bpríomhchathair Cív.
