San Ard-Chúirt, dúirt bean 35 bliain d'aois gur ghoill sé go mór uirthi nuair a chinn an Stiúrthóir Ionchúiseamh Poiblí gan an dlí a chur ar an gcomhraiceoir ealaíon measctha Conor McGregor a bhfuil sé curtha ina leith aici gur éignigh sé í.
Tá sé á mhaíomh ag an mbean, Nikita Hand, gur éignigh Conor McGregor agus fear eile í in óstán i mBaile Átha Cliath sé bliana ó shin.
Tá na líomhaintí atá déanta aici ina n-aghaidh á séanadh ag Conor McGregor agus ag an bhfear eile, James Lawrence.
Dúirt Nikita Hand sa chúirt inniu gur chreid sí gur loiceadh uirthi nuair a chinn an Stiúrthóir Ionchúiseamh Poiblí gan Conor McGregor a chúiseamh.
Tugadh le fios sa chúirt gur scríobh an Stiúrthóir Ionchúiseamh Poiblí litir chuig Nikita Hand inar míníodh di cén fáth nach rabhthas leis an dlí a chur ar an mbeirt fhear.
Tugadh le tuiscint sa litir úd nach raibh aon bhaint ag an gcinneadh leis an gclú a bhí ar dhuine den bheirt.
Mhaígh Nikita Hand i litir a chuir sí féin chuig an Stiúrthóir Ionchúiseamh Poiblí roimhe sin go ndearnadh an cinneadh toisc gur dhuine aitheanta é Conor McGregor.
Tá Nikita Hand ag tabhairt fianaise sa chúirt ó mhaidin.
Nuacht agus Cúrsaí Reatha RTÉ
