Sa Chúirt Choiriúil Speisialta, gearradh téarma príosúin aon bhliain déag ar fhear 46 bliain d'aois faoi dhul i mbun comhcheilge le fear a dhúnmharú i mBaile Átha Cliath in 2016.
Sin é Jason O'Connor, as Garrán Bhaile an Fhaoitigh i mBaile Bhlainséir, a bhí bainteach le drong coirpeach Kinahan agus a phléadáil ciontach i bpáirt a bheith aige sa chomhcheilg le Charlie Cooper a dhúnmharú.
Lámhachadh agus gortaíodh Charlie Cooper ina theach cónaithe i bhFaiche Bhaile an Phaslóigh i Mullach Eadrad ar an 5 Nollaig 2016.
Dúradh sa chúirt go raibh Jason O'Connor ag iarraidh Charlie Cooper a mharú i ndíol comrádaí leis, Keith Walker, a lámhachadh agus a maraíodh bliain go leith roimhe sin.
Dúradh gur de dhearmad a maraíodh Keith Walker mar gur shíl lucht an fheillghnímh gur Jason O'Connor a bhí ann. Bhí Keith Walker ag tiomáint ghlulaisteán Jason O'Connor nuair a maraíodh é i gcarrchlós i gCluain Saileach ar an 12 Meitheamh 2015.
Agus an t-ionsaí lámhaigh ar Charlie Cooper á fhiosrú acu, fuair na Gardaí gaireas criptithe i dteach Jason O'Connor.
Ghlac sé ocht mbliana sular tháinig an cás os comhair cúirte, áfach, mar nach rabhthas in ann na teachtaireachtaí a bhí ar an ngaireas a dhíchriptiú go dtí le déanaí.
Chomh maith leis an gcomhcheilg, phléadáil Jason O'Connor ciontach i gcabhrú le drong coirpeach Kinahan dúnmharú a dhéanamh.
Gearradh cúig bliana déag príosúin air ach cuireadh na ceithre bliana dheireanacha ar fionraí.
Nuacht agus Cúrsaí Reatha RTÉ
