D'impigh Ard-Rúnaí na Náisiún Aontaithe António Guterres ar na hIosraelaigh deireadh a chur láithreach lena n-oibríochtaí míleata sa Bhruach Thiar agus cháin sé iad go neamhdhíreach faoi dhaoine a mharú ann, go háirithe leanaí.
Chuir António Guterres i leith na nIosraelach freisin go bhfuil an ghéarchéim atá sa Mheánoirthear trí chéile, go bhfuil sé á ghéarú tuilleadh acu.
Janez Lenarčič, Coimisinéir Chabhair Dhaonnúil an Aontais Eorpaigh, dúirt seisean go bhfuil an dlí idirnáisúnta agus cearta daonna na bPalaisínteach sa Bhruach Thiar á sárú ag na hIosraelaigh
Tá mórionsaí á dhéanamh ag Arm Iosrael ar cheithre chathair sa Bhruach Thiar ó arú aréir.
Tá cuid de bhonneagar chathair Jenin scriosta ag saighdiúirí ó shin agus tuairiscítear go bhfuil ollscartairí tugtha isteach san áit acu inniu le dúil tuilleadh scriosta a dhéanamh.
Tá bacainní curtha suas ag na hIosraelaigh taobh amuigh de phríomhospidéal na cathrach agus tá otharcharranna á gcíorláil go mion acu sula ligeann siad isteach iad, má ligeann.
Dúirt na hIosraelaigh gur mharaigh siad "cúigear sceimhlitheoirí Palaistíneacha" a bhí i bhfolach i mosc i gcathair Tulkarm, comhalta sinsearach de Jiohád Ioslamach na Palaistíne ina measc.
Chuir na hIosraelaigh i leith Rialtas na hIaráine go bhfuil siad ag tacú le grúpaí míleata Palaistíneacha sa Bhruach Thiar.
Nuacht agus Cúrsaí Reatha RTÉ
