D'fhógair ceannaire an SDLP Colum Eastwood go foirmiúil inniu go bhfuil sé le héirí as an gcúram i dtús mhí Dheireadh Fómhair.
Ag preasócáid i nDoire, dúirt Colum Eastwood gur mhór an onóir aige é beagnach deich mbliana a chaitheamh ina cheannaire ar an SDLP ach thug le fios chomh maith go raibh sé in am éirí as.
Is ag comhdháil bhliantúil an SDLP ar an 5 Deireadh Fómhair a éireos sé as, arsa sé.
Tá Colum Eastwood 41 bliain d'aois agus tá sé ina cheannaire ar an SDLP ó 2015.
Feisire parlaiminte thoghcheantar an Fheabhail atá ann ó 2019, tráth a thóg sé an suíochán ar ais ó Shinn Féin ar son an SDLP le móramh de 17,000 vóta.
Atoghadh é san olltoghchán i dtús na míosa seo caite ach is móramh de 4,000 vóta a bhí aige an uair sin.
Tríd is tríd, tá an SDLP i bhfad chun deiridh ar Shinn Féin i measc náisiúnaithe sa Tuaisceart.
Faoi láthair, tá lua ar bheirt a d'fhéadfadh teacht in áit Cholum Eastwood.
Sin iad an feisire parlaiminte Claire Hanna agus an feisire i dTionól Stormont Matthew O'Toole.
Nuacht agus Cúrsaí Reatha RTÉ
