Tá an Roinn Iompair ag fiosrú líomhaintí a foilsíodh ar an suíomh gréasáin nuachta The Ditch gur iompraíodh airm le haghaidh fhórsaí míleata Iosrael trí aerspás an Stáit seo.
De réir a líomhnaítear, iompraíodh na hairm ar eitleáin le haerlíne shibhialta trí aerspás na hÉireann roinnt uaireanta i mbliana.
Dúirt urlabhraí ón Roinn Iompair go bhfuil cosc ar airm chogaidh a iompar ar aerárthaigh shibhialta in aerspás ardcheannasach na hÉireann mura bhfuil díolúine faighte ón Aire Iompair.
Dhearbhaigh an t-urlabhraí nach bhfuarthas aon iarratas ar dhíolúine maidir le hairm a iompar go dtí Iosrael nó ó Iosrael anuraidh nó go dtí seo i mbliana.
Tugadh le fios freisin go bhfuil an Roinn Iompair ag plé na ceiste leis an aerlíne shibhialta atá i gceist.
Dheimhnigh an Taoiseach Simon Harris inné go raibh an scéal á fhiosrú ag an Rialtas.
Ag labhairt di ar RTÉ inniu, dúirt an Teachta Dála Bríd Smith ó Phobal Roimh Bhrabús go raibh sé contúirteach airm a iompar trí aerspás na hÉireann, gan trácht ar an scrios atáthar a dhéanamh in Gaza.
Thug sí le fios go bhféadfadh an Rialtas an dlí a chur ar an aerlíne atá i gceist as rialacha a shárú.
Nuacht agus Cúrsaí Reatha RTÉ
