Tá cóir leighis á cur san ospidéal ar chailín beag bliain d'aois a gortaíodh go dona nuair a d'ionsaigh madra í i gCo Chiarraí tráthnóna Dé Sathairn seo caite.
Tá fiosrúchán ar bun ag na Gardaí faoin tubaiste a tharla i Leic Snámha i dtuaisceart Chiarraí.
Tuigtear gur bulaí XL an madra a bhí i gceist.
Básaíodh an madra i ndiaidh an ionsaithe.
Cros-phór atá sa bhulaí XL a bhfuil srianta ag baint leis sa Stát seo.
Tá rún ag an Rialtas tuilleadh srianta a chur air ón 1 Deireadh Fómhair agus cosc iomlán a chur air ón 1 Feabhra an chéad bhliain eile.
Tá cosc iomlán ar an mbulaí XL cheana féin sa Tuaisceart agus sa Bhreatain.
Tarraingíodh aird ar an gceist agus cuireadh alltacht ar dhaoine nuair a bhásaigh bean 23 bliain d'aois, Nicole Morey, tar éis do bhulaí XL í a ionsaí ina teach cónaithe i bhFeadamair i gCo Luimnigh dhá mhí ó shin.
I mí na Samhna 2022, bhain drochghortuithe do bhuachaill óg, Alejandro Mizsan, nuair a d'ionsaigh bulaí XL é agus é ag súgradh lena chairde i bpáirc in Inis Córthaidh i gCo Loch Garman.
Nuacht agus Cúrsaí Reatha RTÉ
