Ní "duais atá faighte againn tar éis do RTÉ botún i ndiaidh botúin a dhéanamh" a deir Ardstiúrthóir an chraoltóra faoin maoiniú €725 milliún a d’fhógair an Rialtas inné don stáisiún as seo go deireadh 2027.
Ag labhairt dó ar Morning Ireland dúirt Kevin Bakhurst go raibh 13 mí an-chrua caite ag an eagraíocht agus ag na daoine a bhí bainteach leis an méid a tharla, agus dúirt sé go bhfuil "struchtúir curtha i bhfeidhm anois a chinnteoidh nach dtarlóidh sé arís."
"Tá freagra tugtha againn ar thuarascálacha saineolaithe a bhí ordaithe ag an Rialtas ag léiriú dóibh conas a bheidh an eagraíocht seo níos trédhearcaí agus níos freagraí, agus le cinntiú nach dtarlóidh a leithéid arís."
"Is fíor le fada" a dúirt an ceannasaí nach leor an maoiniú a bhíodh RTÉ a fháil leis an dualgas seirbhís phoiblí atá ar an gcraoltóir a chomhlíonadh.
Faoi phlean an Rialtais a d’fhógair Aire na Meán Catherine Martin inné gheobhaidh RTÉ €225m an bhliain seo chugainn, €240m i 2026 agus €260m i 2027 i dteannta an teacht isteach tráchtála.
Tiocfaidh an maoiniú poiblí a fógraíodh ón gceadúnas teilifíse – a fhanfaidh ag €160 sa mbliain – agus díreach ón Státchiste.
Shéan an tArdstiúrthóir an méid atá ráite ag Virgin Media go bhfuil "duais bronnta ar RTÉ ar easnamh agus droch-chleachtais".
"Tá an t-airgead ceadaithe ag an Rialtas ar an mbonn go bhfuil muid tar éis a ghabháil i ngleic le droch-chleachtais a bhí ann, agus ar an mbonn go bhfuil straitéis anois againn nach féidir a cheistiú ó thaobh loighce agus ó thaobh craoltóireacht phoiblí nua-aimseartha a shásóidh lucht féachana agus éisteachta."
Dúirt an ceannasaí freisin gur lú airgid a bheidh i gceist le aslonnú ó sheanfhoirgnimh ar an suíomh atá ag RTÉ i nDomhnach Broc ná an méid a chosnódh sé na foirgnimh sin a athchóiriú agus a uasghrádú.
Caithfear sciar suntasach den airgead nua atá geallta ag an Stát ar an obair sin a dúirt sé as seo go ceann 5 bhliana.
Mar atá ráite acu go poiblí cheana a dúirt sé "cosnóidh sé tuairim is €150 milliún aistriú chuig foirgneamh nua leis an mbonneagar ceart digiteach, agus chosnódh sé €300 milliún fanacht sna seanfhoirgnimh, suim airgid a bheadh chomh mór nach mbeadh sé iarrtha go deo againn."
Dheimhnigh Kevin Bakhurst go bhfuil €21 milliún curtha go leataobh acu "le n-íoc as conarthaí bréige féinfhostaíochta."
Gheall sé freisin go gcaithfí go leor airgid ar ábhar do lucht féachana agus lucht éisteachta, ar gach cineál ardán.
