I gCúirt Chuarda Bhaile Átha Troim i gCo na Mí, gearradh téarma príosúin trí bliana ar chomhalta den Gharda Síochána faoi chaimiléireacht agus faoi dhallamullóg a chur ar dhaoine.
Sin é Joseph Doyle, 38 bliain d'aois, as Cill Choca i gCo Chill Dara a phléadáil ciontach i 29 cúis shamplach ar an tríú lá dá thriail an mhí seo caite.
89 cúis a bhí curtha ina leith ar an gcéad dul síos.
Bhain na cúiseanna le caimiléireacht, dallamullóg a chur ar dhaoine agus sciúradh airgid idir 2018 agus 2020.
Maidir leis an 29 cúis shamplach, dúradh go bhfuair sé €3,585 ar a laghad dá mbíthin.
Mar Gharda Síochána a bhí bunaithe san Uaimh i gCo na Mí, bhí Joseph Doyle freagrach as cigireacht a dhéanamh ar fheithiclí seirbhíse poiblí.
Agus é i mbun a chúraim, áfach, ghearr sé €25 ar úinéirí na bhfeithiclí sin as tástálacha bréagacha a dhéanamh ar na coscáin.
D'iarr sé freisin €60 as ceadúnais a lamháil do bhusanna scoile, cé nár ghá táille ar bith a íoc.
Ina cheann sin, mheall sé daoine le síntiúis a thabhairt do charthanais mar dhea.
Dúirt an Breitheamh John Martin gur bhain Joseph Doyle mí-úsáid as a phost ceannasach le teacht i dtír ar dhaoine.
Saint údar an fheillbhirt, a dúirt an breitheamh.
Nuacht agus Cúrsaí Reatha RTÉ
