Tá tús le cur tráthnóna inniu le Binse Fiosrúcháin faoin gcóras gearán atá in Óglaigh na hÉireann maidir le bulaíocht, leatrom agus foréigean gnéasach a líomhnaítear a rinneadh ar chomhaltaí ban.
Moladh in athbhreithniú neamhspleách a foilsíodh i mí an Mhárta anuraidh fiosrúchán reachtúil iomlán a bhunú faoin gceist agus gheall an Rialtas ag an am go gcuirfí i bhfeidhm gach uile cheann de na moltaí a bhí san athbhreithniú.
I mí Eanáir seo caite. d'fhoilsigh an tAire Cosanta, an Tánaiste Micheál Martin, téarmaí tagartha an Bhinse Fiosrucháin agus cheap sé an Breitheamh Ann Power mar chathaoirleach.
Déardaoin seo caite a shínigh sé an ionstraim reachtúil ábhartha le feidhm a thabhairt don Bhinse Fiosrúcháin.
Dúirt grúpa ionadaíochta na n-óglach ban a d'fhulaing, Women of Honour, go raibh siad an-sásta gur bunaíodh an fiosrúchán reachtúil.
Gheall Ceann Foirne Óglaigh na hÉireann, an Leifteanant-Ghinearál Seán Clancy, go gcomhoibreodh ceannasaíocht na nÓglach leis an mBinse Fiosrúcháin.
Nuacht agus Cúrsaí Reatha RTÉ
