Tá sé fógartha ag Cumann Phíolótaí Aerlínte na hÉireann go dtosóidh píolótaí in Aer Lingus ag oibriú de réir rialach seachtain ó amárach, Dé Céadaoin 26 Meitheamh.
Thug an ceardchumann le fios nach ndéanfadh na píolótaí aon ragobair agus nach dtabharfaidís faoi aon obair eile a d'iarrfaí orthu a dhéanamh taobh amuigh dá n-uaireanta oibre oifigiúla.
Dúradh nach n-oibreodh na píolótaí ach de réir na n-uainchlár atá foilsithe cheana féin agus nach nglacfaidís le haon leasú ar na huainchláir sin.
Ina cheann sin, a dúradh, ní logálfaidh siad isteach i gcóras ríomhaireachta Aer Lingus agus ní fhreagróidh siad an fón taobh amuigh dá n-uaireanta oibre oifigiúla.
Dhearbhaigh an ceardchumann freisin nach bhféadaí a rá cén uair a chuirfí deireadh leis an ngníomhaíocht thionsclaíoch.
Inné, vótáil 99% de phíolótaí Aer Lingus i bhfabhar tabhairt faoi ghníomhaíocht thionsclaíoch – stailc san áireamh – mar gheall ar aighneas faoi ardú pá.
Nuacht agus Cúrsaí Reatha RTÉ
