Tháinig naonúr os comhair Chúirt Dúiche Dhún Laoghaire ar maidin inniu agus cúiseanna éagsúla curtha ina leith maidir le hagóid a bhí ag ionad d'iarrthóirí tearmainn idirnáisiúnta i ndeisceart Chontae Bhaile Átha Cliath inné.
Gabhadh an cúigear fear agus an ceathrar ban le linn na hagóide i mBaile Uí Ógáin tráthnóna inné.
Cionta a bhaineann leis an ord poiblí a shárú atá curtha ina leith agus tá duine de na fir cúisithe freisin i scian a bheith ina sheilbh aige.
Is iad an naonúr Colin McGettrick, 48 bliain, as Cuan na Lochlannach in Oileán Uiséir, Baile Átha Cliath; David Noonan, 49 bliain, as Eastát na Darach Nua i gCeatharlach; Lisa Burnett, 33 bliain, as Gleann Bhaile Uí Ógáin i gCarraig Mhaighin, Baile Átha Cliath 18; Cathy Kennedy Byrne, 47 bliain, as Bóthar Ghleann na Muc, Baile Átha Cliath 18; Scott Cullen, 39 bliain, as Ascaill Bhaile Uí Ógáin i gCarraig Mhaighin, Baile Átha Cliath 18; Danielle McGearty, 31 bliain, as Halla na Fuinseoige i nGort na Fuiseoige, Baile Átha Cliath 18; Megan Isaacson, 20 bliain, as Garrán Radharc an Chnoic i mBaile an tSaoir, Baile Átha Cliath 16; Graham Carragher, 60 bliain, as Eastát Chnoc an Aitinn in Áth an Ghainimh, Baile Átha Cliath 18; agus Seán Rush, 33 bliain, as Ascaill Éadan Mór sa Chúlóg, Baile Átha Cliath 5.
Is é Seán Rush an té atá cúisithe sa scian a bheith ina sheilbh aige.
Tá an naonúr cúisithe i ndul sa bhealach ar dhuine agus ar fheithiclí in áit phoiblí agus i neamhaird a thabhairt ar threoracha ón nGarda Síochána.
Dúirt an Ceannfort Gordon Wolf sa chúirt go mb'fhéidir go gcuirfí tuilleadh cúiseanna fós i leith an naonúir.
Cheadaigh an Breitheamh Anne Watkin bannaí do gach duine den naonúr, seachas Seán Rush.
D'ordaigh sí dóibh fanacht amach ón ionad tearmainn i mBaile Uí Ógáin agus ó aon duine atá ina chónaí ann nó ag obair ann. Caithfidh siad dul i láthair na nGardaí gach lá freisin.
Tá an t-ochtar le teacht os comhair na cúirte arís i mí Mheán Fómhair.
Maidir le Seán Rush, cuireadh siar faoi choinneáil é agus déanfar iarratas ar bhannaí ar a shon Dé Céadaoin seo chugainn.
Tháinig ceathrar fear eile os comhair Chúirt Dúiche Bhaile Átha Cliath inné agus cúiseanna éagsúla maidir leis an agóid i mBaile Uí Ógáin curtha ina leithse chomh maith.
Sin iad Roger Long, 53 bliain, as Céide Fheirm na Cré i gCill Ghobáin, Baile Átha Cliath 18; Jordan O'Donoghue, 21 bliain, as Ascaill Bhaile Uí Ógáin i gCarraig Mhaighin, Baile Átha Cliath 18; Conor Killian, 25 bliain, as Bóthar Brighton Beag i gCarraig an tSionnaigh, Co Bhaile Átha Cliath; agus Ian Cahill, 44 bliain, as Gleann Bhaile Uí Ógáin i gCarraig Mhaighin, Baile Átha Cliath 18.
Ceadaíodh bannaí don cheathrar fear agus tá siad le teacht os comhair na cúirte arís an mhí seo chugainn.
Nuacht agus Cúrsaí Reatha RTÉ
