Is iad Sinn Féin agus Fine Gael an dá pháirtí is mó a dtacaíonn an pobal leo, de réir suirbhé nua atá déanta ag Ipsos MRBI ar son an Irish Times.
Tá an dá pháirtí sin ag crinneadh a chéile faoi láthair agus sciar 23% de thacaíocht an phobail ag an bpéire acu, más fíor don suirbhé.
Drochscéala atá ann do Shinn Féin, áfach, ós laghdú 5% é ón suirbhé deireanach a rinneadh i mí Feabhra. Ní hamháin sin, is laghdú 11% é ón suirbhé deireanach roimhe sin arís.
Os a choinne sin, dea-scéala atá ann d'Fhine Gael ós méadú 4% é ó mhí Feabhra. Ceapadh Simon Harris mar cheannaire nua an pháirtí agus mar Thaoiseach idir an dá linn.
20% an sciar atá ag Fianna Fáil, nach athrú ar bith é; 4% atá ag an gComhaontas Glas, laghdú 1%; agus 5% atá ag Páirtí an Lucht Oibre, méadú 1%.
Maidir leis na páirtithe eile, 3% atá ag na Daonlathaithe Sóisialta, laghdú 1%; 2% atá ag Dlúthpháirtíocht-Pobal Roimh Bhrabús, mar a bhí; agus 1% atá ag Aontú, mar a bhí. 17% atá ag na Teachtaí Dála Neamhspleácha trí chéile, mar a bhí.
Tá líon na vótálaithe nach bhfuil a fhios acu fós cén dream nó cén duine a vótálfaidh siad ar a son tite go dtí 19% ó 25% sa phobalbhreith dheireanach.
Áirítear lamháil earráide móide nó lúide 2.5% a bheith sa phobalbhreith is deireanaí.
Beifear ag vótáil sna toghcháin áitiúla agus i dtoghchán Pharlaimint na hEorpa trí seachtaine ó amárach.
Nuacht agus Cúrsaí Reatha RTÉ
