Tá sé ordaithe ag fórsaí Iosrael do na mílte duine i gcathair Rafah i Gaza a gcuid áiteanna cónaithe a fhágáil in oirthear na cathrach.
Scaoil aerfhórsa Iosrael tuilleadh buamaí le Gaza thar oíche aréir.
Dúradh leis an lucht cónaithe dul chomh fada le ceantar Al-Mawasi, áit a mbeidh cabhair dhaonnachta le fáil dar leis na húdaráis in Iosrael.
Deir áisíneacht daonchabhrach na Náisiún Aontaithe,UNRWA áfach, go bhfuil an ceantar sin iomlán mí-oiriúnach.
Tá trúpaí Iosrael ag daingniú a ngreim ar na bealaí isteach go Rafah, leide láidir eile nach fada uainn ionradh talún.
Tá seilbh acu anois freisin ar an mbealach trasteorann leis an Éigipt, rud a chiallaíonn go bhfuil bac á chur ar sholáthairtí daonchabhracha.
Suas le 1.5m Pailistíneach atá ag iarraidh foscadh éigin ón gcogaíocht a fháil i Rafah, cuid mhaith díobh i ndiaidh teitheadh as láithreacha cogaidh eile i Gaza.
Bíodh is go bhfuil cáineadh déanta ag na Stáit Aontaithe ar iompar Iosrael sa chogadh seo, tá Rialtas Joe Biden ag coinneáil arm leo i gcónaí.
