Tá athbhreithniú atá déanta ar rialachas RTÉ tar éis laigeachtaí san mbainistiú riosca agus sna srianta inmheánacha a cháineadh go géar, agus tar éis a rá gurbh iad na laigeachtaí sin is cúis leis an ngéarchéim sa gcraoltóir.
Léiríonn an tAbhreithniú ar Rialachas agus Cultúr na heagraíochta - athbhreithniú faoi stiúir an Ollaimh Niamh Brennan as Coláiste na hOllscoile BÁC - go raibh an bainistiú riosca "neamh-aibí", "nach raibh a ndóthain acmhainní ann dó" agus "gur ar éigin a cuireadh san áireamh in aon chor é i bhfeidhmiú Bhord RTÉ ná an Bhord Feidhmiúcháin."
Cothaíodh "timpeallacht cultúir a laghdaigh go mór pé deis a bhí ann leis an leas conspóideach a bhí á bhaint as na cuntais bhabhtála a aithint, agus an mhíthuairisciú a déanadh ar thuarastal Ryan Tubridy a thabhairt faoi deara".
Dúirt an Bord agus na hiniúchóirí inmheánacha nach raibh siad ar an eolas faoin gcuntas babhtála.
Sa gcás sin a deir an tuarascáil, "bhí cuntais bhabhtála RTÉ faoi cheilt os comhair cách".
Deir an tuarascáil nár éirigh leo a dhéanamh amach cé a rinne an cinneadh na cuntais a bhogadh lasmuigh den chlár comhardaithe.
Achar gearr ó shin chuir Aire na Meán Catherine Martin 3 thuarascáil a rinne iniúchadh ar RTÉ faoi bhráid a cuid comh-Airí.
€74,000 an costas go dtí seo atá luaite leis na tuarascálacha.
Léiríonn an fiosrú nár chomhlíon RTÉ an cód cleachtais a bhaineann le rialú comhlachtaí stáit, mar gurbh iad RTÉ iad féin a rinne measúnú orthu féin.
Is iad an Rialtas a choimisiúnaigh péire de na fiosraithe - an t-athbhreithniú ar rialachas agus cultúr, agus athbhreithniú ar íocaíochtaí conraitheoirí agus acmhainní daoine faoi stiúir Brendan McGinty - agus tá 116 moladh iontu faoi leasaithe ar chleachtais an chraoltóra.
Ina measc moltar gurbh iad an tArd-Reachtaire Cuntas agus Ciste a dhéanfadh iniúchadh feasta ar RTÉ; moltar reachtaíocht nua faoi fheidhmiú Bhord RTÉ; agus moltar athruithe ar an gcóras le láithreoirí a earcú agus a chúiteamh.
Tá sé molta chomh maith athchóiriú a dhéanamh ar chóras liúntas RTÉ, agus táthar ag iarraidh a chinntiú go mbeadh scéimeanna iomarcaíochta ón gcuideachta cóir, cothrom.
In Athbhreithniú McGinty tá sé molta go mbeadh srian airgid, chomh maith le údarú ó Bhord RTÉ, ag baint feasta le íocaíochtaí iomarcaíochta agus íocaíochtaí scoir.
Beidh 6 seachtainí anois ag RTÉ leis na tuarascálacha a scrúdú agus cinneadh a dhéanamh faoi glacadh nó diúltú do na moltaí.
Deir an tAire Martin go bhfuil súil aici gur freagra dearfach a bheidh ann, le go mbeidh an Rialtas in ann cinneadh críochnúil a dhéanamh faoi mhaoiniú an chraoltóra.
Ina theannta sin tá an 3ú tuarascáil ó na cuntasóirí Mazars faighte freisin ag an Rialtas, dianscrúdú ar "chuntais bhabhtála" RTÉ agus cuntais lasmuigh den chlár comhardaithe.
Beidh a mbreithiúnas le tabhairt ag an Rialtas air sin freisin, ach tá an 3 thuarascáil foilsithe anois tráthnóna.
Tá fáilte curtha ag RTÉ roimh fhoilsiú na dtuairiscí.
Glacann siad "i bprionsabal" leis na moltaí, scrúdóidh siad tuilleadh iad a deir siad, agus leanfar leis an athchóiriú a deir siad atá tosaithe cheana féin sa stáisiún.
