Tá fear thart ar 25 bliain d'aois tar éis bháis de bharr a chaite sa bpríomhcathair thar oíche.
Creideann na Gardaí go raibh baint ag coiriúlacht eagraithe leis an marú.
Bhí veisteanna piléardhíonacha á gcaitheamh ag an triúr nuair a gabhadh iad.
Bhí roinnt feithiclí i gceist tuairiscítear aréir, i mbun ruathair agus ag bualadh faoina chéile.
Tuairiscítear gur scaoileadh piléir as gunnaí éagsúla.
Creideann na Gardaí gur ionsaí a bhí ann a bhí ullmhaithe go cúramach.
Fritheadh buma píopaí le taobh an fhir mhairbh agus b'eigean fios a chur ar Mheitheal Diúscartha Buamaí an Airm.
Go gairid tar éis meánoíche a caitheadh an fear óg ar Bhóthar Chnoc na Riabh i nDroimeanach.
Níorbh fhada ina dhiaidh a gabhadh an triúr fear atá á gcoinneáil ag Gardaí i mbeairicí éagsúla i mBaile Átha Cliath.
Is féidir iad a cheistiú ar feadh 3 lá.
Tá corp an té a maraíodh fós ar an láthair, agus tá an áit caomhnaithe agus scrúdú dlí-eolaíoch tosnaithe ó roimh am lóin.
Tá scrúdú iarbháis le déanamh freisin.
Tá na Gardaí ag lorg cúnamh ón bpobal agus iarrtar ar dhaoine a ghabháil i dteagmháil le Beairic Bhóthar Ghrianréime ar 01 666 6600 nó 1800 666 111.
