Tá gluaisrothair streachailte, gluaisrothair leictreacha, rothair leictreacha agus scútair leictreacha – 34 san iomlán – i measc na bhfeithiclí a choigistigh na Gardaí tar éis dóibh 40 ionad a chuardach i mBaile Átha Cliath inné.
Chomh maith leis na feithiclí dárothacha sin, choigistigh na Gardaí trí chuadrothar, scairdscí agus leantóir.
Coigistíodh cúig uaireadóir dearthóra, earraí eile dearthóra agus €42,950 in airgead tirim freisin.
Baineann coirpigh leas as feithiclí dárothacha agus drugaí á ndíol acu, agus le gunnaí iompar ó áit go háit. Is furasta éalú ó na Gardaí ar scútar leictreach, cuir i gcás, san áit nach bhfuil spás do charranna.
Ina cheann sin, ceannaíonn coirpigh feithiclí mar iad le hairgead tirim chun a bhfáltas cam a sciúradh.
Fuarthas luach €8,000 de chócaon agus de channabas freisin sna háiteanna a chuardaigh na Gardaí inné agus tá beirt gafa acu.
Nuacht agus Cúrsaí Reatha RTÉ
