Níor scaoil an Pápa Proinsias géarchéim Gaza ná na hÚcráine thairis ina theachtaireacht bhliantúil Cásca Urbi et Orbi inniu.
In aitheasc a thug an Pápa do na mílte duine a bhí bailithe i gCearnóg Pheadair sa Róimh agus a craoladh ar fud an domhain d'iarr sé sos cogaidh i Gaza agus go scaoilfeadh Hamas saor na gialla ar fad atá aige.
D'iarr sé freisin go dtiocfadh an Rúis agus an Úcráin ar shocrú eatarthu a d'fhágfadh go bhféadfaí príosúnaigh ón dá thaobh a scaoileadh saor tré chóras babhtála.
Tá an cogadh san Úcráin ag réabadh leis i gcónaí, cogadh a thosaigh le ionradh na Rúise i bhFeabhra 2022.
Roimhe sin cheiliúraigh an Pápa Aifreann Dhomhnach Cásca agus suas le 30,000 duine bailithe i gCearnóg Naomh Peadar.
Is i gcathaoir rotha a tháinig an Pápa chuig an ócáid.
87 bliain d'aois atá sé anois.
Tá imní léirithe le tamall faoina shláinte. agus cé chomh fada eile a bheidh sé ina phríomhthreoraí ag an suas le 1.3 billiún Caitliceach ar fud an domhain.
Bíodh sin mar atá tuairiscítear gur thug an Pápa a theachtaireacht 10 nóiméad uaidh i dteanga na hIodáilise gan aon ró-dheacracht inniu.
Léiríodh nach raibh mairg air ach oiread i gcaitheamh an tsearmanais dhá uair a chloig ná go deimhin ina dhiaidh sin ag casadh le daoine agus á mbeannú.
Deirtear go mbeidh sé páirteach freisin tráthnóna i dTuras Bhealach na Croise,ócáid nach raibh sé i láthair aici ar Aoine an Chéasta a bhuíochas do chúrsaí sláinte.
