Tá sé dearbhaithe ag Uachtarán na Stát Aontaithe Joe Biden go mbeidh sé ina iarrthóir arís ar son an Pháirtí Dhaonlathaigh sa chéad toghchán uachtaránachta eile in 2024.
Is i bhfíseán a d'eisigh a fhoireann toghchánaíochta a dheimhnigh Joe Biden, atá 80 bliain d'aois, go n-iarrfadh sé ar mhuintir Mheiriceá an dara téarma ceithre bliana a lamháil dó.
Maíonn an tUachtarán Biden san fhíseán go ndearna sé an cinneadh seasamh arís mar go bhfuil sé de dhualgas air daonlathas na Stát Aontaithe a chosaint.
Is obair í a bhfuil bailchríoch le cur uirthi, ar sé.
Cáineann sé freisin clár oibre an Pháirtí Phoblachtaigh i dtaca le cúram sláinte ban, leas sóisialta agus saoirse cainte de.
Dealraíonn sé faoi láthair gurb é Donald Trump a bheas mar chéile comhraic ag Joe Biden sa toghchán an bhliain seo chugainn, cé nach bhfuil sé aimnithe mar iarrthóir ag na Poblachtaigh fós.
Ní gan dua, áfach, a bhainfeas Joe Biden an dara téarma amach, má bhainfidh.
Níl ach 39% de phobal Mheiriceá sásta leis, de réir suirbhé a foilsíodh sé lá ó shin.
Ina cheann sin, tugadh le fios i suirbhé eile go bhfuil an aois mhór atá aige ar cheann de na fáthanna nach gcreideann ach duine as gach ceathrar gur cheart dó seasamh arís.
Os a choinne sin, dar lena chuid dochtúirí go bhfuil an tsláinte go maith ag Joe Biden agus go bhfuil sé sách folláin lena dhualgais a chomhlíonadh mar is cóir.
Dearbhaíodh san fhíseán toghchánaíochta chomh maith go mbeadh an Leas-Uachtarán Kamala Harris ina comhiarrthóir aige arís in 2024.
Nuacht agus Cúrsaí Reatha RTÉ
