Tá sé ordaithe ag Cumann Lúthchleas Gael cluiche ceannais peile na gclubanna idir Crócaigh Chill Mochuda as Baile Átha Cliath agus an Gleann as Doire a athimirt.
Eisíodh an t-ordú ar maidin inniu tar éis do choiste CLG an scéal a phlé ag éisteacht a tionóladh aréir.
Baineann an scéal le himreoir breise a chuir lucht Chill Mochuda ar an bpáirc imeartha i bhfíordheireadh an chluiche naoi lá ó shin.
Bhí Cill Mochuda dhá chúilín chun tosaigh ag an am agus sin mar a chríochnaigh an cluiche.
Díreach ina dhiaidh, thug bainisteoir an Ghleanna Malachy O'Rourke le tuiscint gur dhóichí go nglacfadh an club leis an toradh ach nuair a bhí deireadh ráite rinneadh gearán oifigiúil le lárchoiste éisteachta CLG.
Tá trí lá ag na Crócaigh le achomharc a dhéanamh in aghaidh an ordaithe a eisíodh inniu.
Má ghlactar lena n-achomharc nó má dhiúltaítear dó, tá cead ag an dá chlub achomharc eile fós a dhéanamh.
Nuacht agus Cúrsaí Reatha RTÉ
