Ní foláir breathnú arís ar an reachtaíocht a bhaineann le cineálacha áirithe madraí, a dúirt an Taoiseach Micheál Martin.

Baineann an scéal leis an ionsaí fíochmhar a rinne madra drochmhianaigh ar bhuachaill naoi mbliana d'aois i gCo Loch Garman an deireadh seachtaine seo caite.

Cineál tarbh-bhrocaire a bhí sa mhadra a thug fogha faoin mbuachaill - Alejandro Mizsan - agus é ag amuigh ag súgradh in éineacht lena chairde in Inis Córthaidh tráthnóna Dé Domhnaigh seo caite.

Ar ámharaí an tsaoil, d'éirigh le comharsana an madra a shracadh de Alejandro ach bhí an buachaill bocht loite go dona faoin am sin.

Ag labhairt dó sa Dáil, dúirt an Taoiseach go raibh sé ag cuimhneamh ar an mbuachaill agus a mhuintir.

Thug sé le fios go raibh gach duine i nDáil Éireann suaite - agus feargach freisin - de bharr ar tharla.

Dúirt sé chomh maith nár thuig sé cén fáth a raibh madraí dainséaracha ag daoine.

Caithfear breathnú ó bhonn arís ar na dlíthe a bhaineann leis na madraí sin, arsa sé.

Ag tabhairt freagra a bhí Micheál Martin ar an Teachta Dála Alan Dillon ó Fhine Gael a dúirt go ndearna madraí 1,700 ionsaí ar dhaoine sa tír seo idir 2016 agus 2021, ar ardú suntasach an méid sin ó na cúig bliana roimhe sin.