Tá Twitter tar éis cuid dá bhfostaithe in Éirinn a scaoileadh chun bealaigh.
Cuireadh ríomhphost ar maidin chuig oibrithe áirithe i mBaile Átha Cliath, inar cuireadh in iúl dóibh go bhfuil iomarcaíocht i ndán dóibh.
Tá oifig an chomhlachta sa phríomhchathair dúnta go sealadach agus níl cead ag oibrithe dul isteach inti.
Bhí súil lena leithéid d'fhógra, i ndiaidh don úinéir nua, Elon Musk, smacht a ghlacadh ar Twitter.
Bhí sé ráite chean féin ag an mbainistíocht go gcuirfí oibrithe ar an eolas faoi 09:00 inniu am Mheirceá (nó 16:00 am na hÉireann) maidir le ciorruithe.
Bhí thart ar 500 duine fostaithe ag Twitter i mBaile Átha Cliath.
"Dhúísigh mé ar maidin don scéal nach raibh mé fostaithe sa chomhlacht níos mó", a scríobh iarfhostaí Éireannach amháin ar Twitter.
Tuigtear go bhfuil fostaithe a bhfuil iomarcaíocht i ndán dóibh glasáilte amach as córas ríomhphoist an chomhlachta, agus as córais inmheánacha eile.
Ní léir go fóill cé mhéad oibrí a scaoileadh chun bealaigh ón oifig i mBaile Átha Cliath. Ach tuigtear go bhfuil sé i gceist ag Twitter 50% dá bhfórsa oibre a chiorrú ar fud an domhain.
Deir saineolaithe ón tionscal teicneolaíochta go bhfuil ciorruithe le déanamh ar fhoirne ar leith, seachas le bheith déanta ar bhonn tíreolaíochta.
