Is mó Caitliceach ná Protastúnach ó thuaidh an chéad uair ó bunaíodh Tuaisceart Éireann 101 bliain ó shin, de réir fhigiúirí an daonáireamh is deireanaí.
Léiríonn an cuntas a déanadh mí an Mhárta 2021 gur 45.7% den phobal a deir gur Caitlicigh iad nó a tógadh ina gCaitliceach.
43.5% an líon a deir gur Protastúnaigh iad nó gur de chúlra Protastúnach iad.
9.3% a deir nach de bhunú cheachtar den dá chreideamh sin iad.
Tá 0.6% d'ardú tagtha ar líon na gCaitliceach ó 2011 i gcomparáid le 5% de laghdú ar líon na bProtastúnach. Léiríonn scagadh ar an daonáireamh go bhfuil sciar níos airde den phobal Protastúnach níos sine agus go bhfuil ráta báis níos airde ina measc.
1,903,100 duine atá ina gcónaí ó thuaidh - 5% d’ardú le 10 mbliana anuas. Is é an líon is airde ina gcónaí sna 6 Chondae ó bunaíodh Tuaisceart Éireann i 1921.
Léiríonn na figiúirí nua gur 12.4% den phobal a deir go bhfuil cumas acu sa nGaeilge. 10.7% a dúirt go raibh líofacht acu i 2011 – beagnach 20% d’ardú.
Tá méadú mór de 63.5% tagtha ar líon na ndaoine a bhfuil pas de chuid na hÉireann acu - ó 375,800 go dtí 614,300.
Beagán le cois milliún duine atá taobh le pas de chuid na Ríochta Aontaithe – laghdú ollmhór ón 1,700,000 a bhí ann 10 mbliana ó shin sula raibh aon chaint ar an mBreatimeacht.
