Áirítear faoi láthair thart ar mhíle duine a bheith maraithe mar gheall ar chrith talún a tharla in oirdheisceart na hAfganastáine, gar don teorainn leis an bPacastáin.

Gortaíodh na céadta chomh maith de bharr an chreatha talún a raibh méid sheismeach 6.1 ann agus tuigtear go bhfuil go leor eile sáinnithe i smionagar a dtithe.

Is i gceantar iargúlta sléibhtiúil, 44 ciliméadar ó chathair Khost, a bhí eipealár an chreatha.

Tuairiscítear gur airigh 119 milliún duine san Afganastáin, sa Phacastáin agus san India an crith.

Léiríonn picitúir a foilsíodh agus a craoladh sna meáin san Afganastáin gur leacaíodh sráidbhailte ar thalamh ard mar gheall ar an gcrith a tharla i gcaitheamh na hoíche agus daoine ina gcodladh.

Méid sheismeach 6.1 a bhí sa chrith talún (Pic: @Alham24992157)

Tá an réigiún suite ar phláta teicteonach atá á bhrú go láidir ag pláta eile atá ag gluaiseacht aneas ón bPacastáin.

Ainneoin aimhréidhe na talún sa réigiún, tá lucht tarrthála agus fóirithinte ag déanamh a ndíchill an áit a bhaint amach.

Is dúshlán mór é seo do na húdaráis san Afganastáin de cheal an bhonneagair agus an trealaimh is nua-aimseartha.

Ar a mhuin sin, cuireadh smachtbhannaí idirnáisiúnta ar an tír nuair a tháinig an Talaban i gcumhacht arís anuraidh.

Ce ea, tá na Náisiúin Aontaithe ag tabhairt cabhair dhaonnúil don tír i gcónaí agus tá foirne idirnáisiúnta ar a mbealach chun an réigiúin cheana féin.