Tá bonn óir Oilimpeach buaite ag rámhaithe na hÉireann Paul O'Donovan agus Fintan McCarthy sa chomórtas céaslaire beirte i dTóiceo.

Cé gur rogha na coitiantachta a bhí sa dís Chorcaíoch roimh an rás ní raibh daingean acu leis an mbonn óir, agus bhí foireann na Gearmáine sínte leo go dtí an deireadh. Is iad na hIodálaigh a tháinig sa tríú háit.

Sé nóiméad, sé shoicind a thóg sé ar an mbeirt fhear as an Sciobairín an rás a chríochnú. Sin 0.86 soicind chun cinn ar na Gearmánaigh, beagán níos mó ná leathfhad.

Seo an dara bonn atá buaite ag rámhaithe na hÉireann ag na Cluichí Oilimpeacha i dTóiceo go dtí seo tar éis d'fhoireann na mban bonn cré-umha a bhuachan i gcraobh na gceathrar arú aréir.

Ag labhairt dó le RTÉ i ndiaidh an ráis, thug Paul O'Donovan le fios gur chloígh an dís leis an modh oibre a bhíonn acu de ghnáth le linn an ráis.

Dúirt sé go raibh siad ag súil le géariomaíocht ó iomróirí na Gearmáine agus na hIodáile ach go raibh muinín acu astu féin i gcónaí.

Rinne Uachtarán na hÉireann Michael D Higgins comhghairdeachas le Paul O'Donovan agus Fintan McCarthy.

Dúirt sé gur sárghaisce a bhí ann agus go dtugann a bhfuil baint amach acu, go dtugann sé misneach do lúthchleasaithe óga in Éirinn.