Tá sé tugtha le fios ag ceannasaí Fheidhmeannacht na Seirbhíse Sláinte Paul Reid gur dóichí go gcosnóidh sé na deicheanna milliún euro leis an damáiste a rinneadh do ríomhchóras na heagraíochta an tseachtain seo caite a chur ina cheart.

Tá seirbhísí sláinte ar fud na tíre moillithe go mór mar gheall ar chibirionsaí a rinneadh ar an ríomhchóras ag deireadh na seachtaine seo caite.

Dúirt Paul Reid gur gníomh tromchúiseach coiriúil in aghadh daoine breoite a bhí san ionsaí haiceála.

Ag labhairt dó ar RTÉ, thug Paul Reid le fios go mbainfear leas an tseachtain seo as ospidéil phríobháideacha le seribhísí oinceolaíochta agus roinnt tástálacha diagnóiseacha a chur ar fáil.

Dúirt sé nach bhfuil a fhios aige cá mhéad airgid atá á éileamh mar éiric fuascailte ag na foghlaithe agus gurb iad lucht cibearshlándála náisiúnta atá ag plé leis an gceist sin.

Dúirt Máistir Ospidéal an Rotunda i mBaile Átha Cliath go bhfuil súil aige go bhféadfar coinní sceidealaithe agus roghnacha a chur ar fáil arís ón tseachtain seo chugainn.

Cé ea, a dúirt an tOllamh Fergal Malone, is ospidéal iomlán digiteach é an Rotunda agus ní bheifear in ann aon fhaisnéis atá caillte a fháil ar ais.

I dtaca le sláinte leanaí, deirtear go bhfuil seirbhísí éigeandála ar fáil i gcónaí agus go bhfuil sé i gceist an oiread seirbhísí roghnacha agus is féidir a chur ar fáil.

Ar an dea-uair, a deir Feidhmeannacht na Seirbhíse Sláinte, ní gach ospidéal sa tír atá i dtaobh le ríomhchóras lárnach na heagraíochta agus ní hionann mar a chuaigh an t-ionsaí haiceála i bhfeidhm orthu go léir.