Tá duine de Ghaeil mhóra Bhéal Feirste Albert Fry tar éis bháis. Bhí sé os cionn ceithre scór bliain d'aois.

B'as tuaisceart na cathrach ó dhúchas é.

Bhí cáil air mar ghníomhaí teanga, cheoltóir, ailtire agus mar pheileadóir go deimhin, agus bhí dáimh mhór aige le Gaeltacht Thír Chonaill, áit a raibh teach aige i Mín Corrbhaic.

Chuir sé cúpla glúin faoi dhraíocht leis na leaganacha cruinne binne a bhí aige de chuid d'amhráin mhuintir Rann na Feirste.

Ba é an chéad duine ón Tuaisceart a bhí ina uachtarán ar Chonradh na Gaeilge agus bhí sé an-ghníomhach i dtólamh i gCumann Chluain Ard Bhéal Feirste.

Bhí baint mhór ag Albert Fry fosta le bunú agus forbairt Bhunscoil Phobal Feirste, an chéad Ghaelscoil sa Tuaisceart.