Tá cáineadh géar déanta ar phóilíní Londain faoin mbealach ar laimhséail siad bigil aréir a bhí eagraithe i gcuimhne ar Sarah Everard.
Tharla achrann idir na póilíní agus daoine a bhí i láthair ag an mbigil neamhoifigiúil ag Clapham Common sa chathair aréir.
Tá tuairisc iomlán iarrtha ag Rúnaí Baile na Breataine Priti Patel faoin méid a thit amach ag an mbigil.
D'fhreastail níos mó ná 1,000 duine ag an mbigil i gcuimhne ar Sarah Everard, an bhean sna 30í a fuadaíodh agus a dúnmharaíodh.
Ghabh na póilíní ceathrar le linn na hoíche.
Theastaigh ón lucht eagraithe go gcuirfí an bhigil ar ceal aréir mar gheall ar shrianta COVID-19, ach níor tharla sé sin.
Chosain oifigeach sinsearach sna póilíní an méid a tharla aréir agus dúirt go raibh ar na póilíní gníomhú ar mhaithe le daoine a choineáil slán sábháilte.
Inné i Londain, Shasana, tugadh Wayne Couzens, atá 48 bliain d'aois, os comhair cúirte, dá chéad éisteacht chúirte.
Cúisíodh an póilín oíche Dé hAoine as Sarah Everard a fhuadach agus a dhúnmharú.
Sa chúirt inné cuireadh Wayne Couzens siar faoi choinneáil. Tabharfar os comhair na cúirte arís é Dé Máirt seo chugainn.
Dé hAoine dhearbhaigh na póilíní i Sasana gurb é corp Sarah Everard a fuarthas i Kent, lasmuigh de Londain.
Bhí sí ar iarraidh le 9 lá.
Thángthas ar an taisí daonna i gceantar coille in Ashford le linn na seachtaine.
Chonacthas Sarah Everard, (33) go deiridh ag siúl abhaile ó arasán chara léi i ndeisceart Londain ar an gCéadaoin, 3 Márta.
