Adhlacadh craoltóir aitheanta RTÉ Larry Gogan inniu. Cailleadh an dioscmharcach ag tús na seachtaine. Bhí sé 81 bliain d'aois.
Bhí aides-de-camp Uachtarán na hÉireann agus an Taoisigh Leo Varadkar i measc an tslua a bhí i láthair ag an Aifreann éagnairce i Séipéal Naomh Pius X i dTeach Mealóg i mBaile Átha Cliath.
Dúirt príomhcheiliúraí an Aifrinn Brian Darcy gurbh é Larry Gogan an dioscmharcach ab fhearr a bhí riamh ann.
D'fhreastail Ard-Stiúrthóir RTÉ Dee Forbes agus cathaoirleach bhord RTÉ Moya Doherty ar an tsochraid thar ceann na heagraíochta agus bhí Larry Mullen ó U2 i measc na gceoltóirí a bhí i láthair.
Chaith Larry Gogan beagnach 60 bliain ag craoltóireacht agus is mar gheall ar a chuid oibre mar dhioscmharcach ar Raidió RTÉ, go háirithe 2FM, is mó a bhí aithne air.
