Tá Cyril Ramaphosa tofa ina uachtarán nua san Afraic Theas, ag parlaimint na tíre.
Tagann sé i gcomharbacht ar Jacob Zuma, a d'éirigh as oifig inné.
Fear gnó agus duine a bhíodh i mbun feachtais in aghaidh na cinedheighilte, is é Cyril Ramaphosa. Tá sé i gceannas an ANC ó mhí na Nollag seo caite.
Bhí vóta mímhuiníne le cur i Jacob Zuma, i dteach na parlaiminte inniu, mura n-éireodh sé as oifig.
Tá líomhaintí caimiléireachta curtha ina leith, líomhaintí atá á séanadh aige.
