Tá áthas ar an gCiste Craoltóireachta Gaeilge agus ar TG4 an tsraith Scoil Choille, a sheoladh, sraith nua 12 chlár trína gcuirfear páistí idir 5-9 mbliana d'aois faoi gheasa ag áilleacht an dúlra.
Tabharfar an lucht féachana ar thuras trí shéasúir na bliana sa tsraith aoibhinn seo arna léiriú ag Corcra Media Teo agus arna cur i láthair ag Frainc Mac Cionnaith, Gráinne Holland agus a gcuid páistí Naoise agus Síomha, iad ag nochtadh seoda folaithe na coille.
Eispéireas uathúil foghlama faoin spéir atá sa tsraith Scoil Choille, ina bhfiosrófar na radharcanna agus na fuaimeanna a bhaineann le gach séasúr. Bígí i dteannta Fhrainc, Ghráinne, Naoise, agus Shíomha agus iad ag dul ar eachtraí spreagúla, ag nochtadh rúin an dúlra atá ar leac an dorais againn ar fad.
Tabharfar léargas ar mar a bhíonn cúrsaí sa choill le linn na séasúr ar fad sa tsraith seo. Is san Earrach a thosaíonn beocht ag teacht arís sa choill agus caithfear súil ar théamaí ar nós 'neacha, 'bláthanna’ agus ‘éin ag neadú’.
Spreagann teas an tSamhraidh na páistí a gcuid raftaí féin a thógáil agus foghlaim faoi shaolré an fhéileacáin. Is san Fhómhar a thugtar flúirse na foraoise faoi deara agus is sa Gheimhreadh a nochtar an chaoi a n-éiríonn le neacha na coille maireachtáil le linn na haimsire fuaire.
Cothófar gean i bpáistí don dúlra sa tsraith Scoil Choille agus spreagfar iad an domhan mórthimpeall orthu a fhiosrú. Bainfear leas as scéalaíocht, gníomhaíochtaí praiticiúla agus neart ceoil sa tsraith seo chun go mbeidh an lucht féachana óg ábalta nasc a dhéanamh leis an timpeallacht nádúrtha atá ina dtimpeall.
Príomhghnéithe Scoil Choille:
- Sraith 12 chlár dírithe ar pháistí idir 5-9 mbliain d'aois.
- Á cur i láthair ag Frainc Mac Cionnaith, Gráinne Holland, Naoise agus Síomha.
- Fiosraítear an domhan nádúrtha agus séasúir na bliana sa choill.
- Dírítear ar fhoghlaim faoin spéir, ar thascanna ealaíona agus ar cheol.
- Cothaítear gean don dúlra agus feasacht ar an chomhshaol.
