Labhair Liadh Ní Riada le Helen Ní Shé ar An Saol Ó Dheas ar RTÉ Raidió na Gaeltachta faoina ceapachán nua mar Oifigeach Pleanála Teanga i gceantar Mhúscraí.

Fógraíodh inniu go bhfuil Ní Riada ceaptha sa ról agus deir Liadh go bhfuil sí fillte ar Éirinn, go bhfuil sé 'go hálainn' a bheith sa bhaile ach go n-aithníonn sí na dushláin atá roimpi sa ról ach go háirithe nuair nach féidir imeachtaí a reachtáil.

Deir Ní Riada 'go hiontach ar roinnt slite' go bhfuil an teicneolaíocht againn chun imeachtaí a reachtáil ar líne nuair nach féidir teacht le chéile mar phobal. Mar chuid dá post, deir sí gur mhaith léi cabhrú leo siúd nach dtuigeann conas an fón cliste a úsáid chun go mbeidís in ann a bheith mar chuid d'imeachtaí Gaeltachta, ar líne.

Chomh maith le sin, tá obair ag teastáil i nGaeltacht Mhúscraí maidir le comharthaíocht chun go n-aithneodh daoine go bhfuil siad sa Ghaeltacht agus tá suíomh gréasáin nua le forbairt freisin. 

Liadh Ní Riada

Ag caint ar cheist mhór na teanga i measc phobal an Bhéarla, deir sí go bhfuil droichead le tógáil idir na Gaeil agus pobal an Bhéarla agus 'seachas a bheith ag caint linn féin' gur gá aghaidh a thabhairt ar an dícheangail sin nó 'mura dtabharfaidh muid an chuid den dream linn ag snámh in aghaidh taoide'.

Maidir leis an bplean atá le cur i bhfeidhm chun an teanga a chaomhnú agus a neartú i nGaeltacht Mhúscraí, deir Ní Riada go bhfuil sí ag súil le tacaíocht 'ón dtalamh aníos' ó mhuintir na Gaeltachta.

Tá cúrsaí polaitíochta curtha ar leataobh ag Liadh ach deir sí nach bhfuil an doras dúnta sin ach go bhfuil sí sáite ina ról nua i láthair na huaire. Ag caint ar an uair gur rith sí d'Uachtarán na tíre, deir sí nach raibh 'fonn' uirthi ach nuair a rinne sí an cinneadh go ndeachaigh sí leis céad faoin gcéad. Síleann sí go roghnaíodh í mar iarrthóir toisc, i measc rudaí eile gur bean í, mar gheall ar a hoidhreacht agus leis an obair mhaith a bhí déanta aici go dtí sin.

Craoltar An Saol Ó Dheas ar RTÉ Raidió na Gaeltachta idir Luan go hAoine 12.08-1.00