Ar Malairt Poirt na seachtaine seo beidh roinnt ceoil nua ó cheoltóirí Éireannacha á sheimint agam maraon le sean rianta clascacha ón dtraidisiúin agus ceol ón Ind, ón mBriotáin, ón tSualainn agus ó Albain.

Bhíos ar bís cloisint go bhfuil an veidhleadóir iontach Zöe Conway as contae Lú mar dhuine de phriomhcheotóirí an fhuaimrian don bhfíseán mór Artemis Fowl atá á eisiú ag Disney go luath timpeall an domhain – bunaithe ar leabhair an scríbhneora Éireannaigh Eoin Colfer. Éireannach eile, Patrick Doyle a chum an fhuaimrian agus scríobh sé an píosa seo – príomhtéama an scannán go speisialta do Zöe féín. Comhghairdeachas mór le Zöe, seo an rian Father and Son ó Artemis Fowl.

Beidh cúpla rian de cheol Indiach á sheimint agam. Nuair a bhíos óg bhí dúil ana mhór agam i gceol an ghrúpa Shakti a chuir an giotaraí snagcheoil Sasanach le chéile le ceoltóirí Indiacha. D'imíodar go mór i bhfeidhm ar cheoltóirí leis an nascadh ceoil agus an cóiriú úr nua a dheineadar ar an gceol Indiach. Seo an rian is fearr liom uatha. Two Sisters, ón albam A Handful Of Beauty a tháinig amach i 1976 le L. Shankar ar an veidhlín.

Beidh blaiseadh de cheol na Briotáine agam ar an gclár, ina measc ceann des na guthanna is binne ón dtraidiúsiún úd ar m'aithne, Yann-Fanch Kemener. Seo é le Didier Squiban ar an bpiano agus tagann rian ón albam Enez Eusa a eisíodar i 1995. Seo "Me’zo Ganet e-kreiz ar mor" a chiallaíon "Rugadh mé i lár na farraige". Tá leagan álainn do seo athruithe go Gaidhlig ag Julie Fowlis chomh maith.

Níl ansin ach sampla beag den aistear ceoil a bheidh againn an Sathairn beag seo ar Malairt Poirt le Muireann ar RTÉ Raidió na Gaeltachta óna 7-9pm. Bígí liom.