"Sé fírinne an scéil ná, daoine áitiúla a maraíodh, daoine áitiúla a rinne an dúnmharú, daoine áitiúla a phleanáil é, daoine áitiúla a thug fianaise bréige sna cúirteanna agus daoine áitiúla a bhí mar bhrathadóirí" a deir Seán Ó Cuirreáin faoi dhúnmharuithe a tharla i bpobal beag iarghúlta in 1882. 

Taispeánadh Murdair Mhám Trasna don chéad uair ag Oireachtas na Samhna i gCill Airne. Labhair scríbhneoir an leabhair, Éagóir, Seán Ó Cuirreáin agus Léiritheoir an scannáin, Ciarán Ó Cofaigh le Bláthnaid Ní Chofaigh ar a clár, Bláthnaid Libh ar RTÉ Raidió na Gaeltachta faoin scéal fuillteach. 

Deir Seán go bhfuil athrú tagtha ar an gcaoi a bhfuil an pobal ag breathnú ar an scéal agus anois go bhféachfar ar an eachtra anois mar chuid den stair. Deir sé áfach, 'go bhfuil daoine áirithe sa gceantar nach maith leo é a phlé'. 

Tá ráiteas eisithe ag an Uachtarán Mícheál D. Ó hUiginn maidir leis an eachtra ina bhfuil an scannán bunaithe:

"Gach rud a tharla ar leibhéal an Stáit bhí sé go dona. Bhí breabaireacht i gceist. Níor tugadh seans ceart do na daoine a bhí cúisithe iad féin a chosaint. Ní raibh atmaisféar na cothromaíochta ann agus ní raibh an chothromaíocht ann nuair a bhí tú ag caint faoin bpróiseas dlí ag an am," a deir an tUachtarán.

Dúirt léiritheoir an scannáin Ciarán Ó Cofaigh gur "dul chun cinn an-suntasach" é fógra an Uachtaráin go raibh saineolaí ceaptha le comhairle a chur ar an Rialtas agus ar an Uachtarán maidir le cás Mhám Trasna. "Bheadh sé ar fheabhas ar fad dá dtabharfaí pardún iarbháis anois dóibh siúd a ciontaíodh san éagóir 135 bliain ó shin. Más mall is mithid," a dúirt sé.

Craolfar Murdair Mhám Trasna amach anseo ar TG4, an dáta le deimhniú.